Assiowe divins l’valèye,
Antourèye di t’champs,di bwès, di vèrdeûr.
E-st-èle don fîre di mostrer à djins slbèle pareûre.
E monde ètîr on l’a tchanté;
Di tos ses bés åtous on-a sovint djàzé.
Mins po nos-ôtes,Spåtwès,nosse cour dirè todi:
« Spa nosse pitite vêye,c’è-st-on vrêy paradis ».
I-n-a bran’mint dès noms qu’à nos oreyes clik’tèt:
E Gravioûle, Haut-Vinâve,Pont Mindroz,Li Vî Spa,
Des noms qui nos parints prononcît di ç’timps-là.
Si minme nos-ôtes,on pô,nos lès avans rouvî,
ci n’èst nin par rigrignèdje,ci n’èst nin par mépris.
Mins c’èst surtout à nos-èfants qui fåreût lès aksègnî
Po qu’i n’rouvièsse nin cwand i sèront pus vîs,
Qui Spa noss pitite vèye,c’è-st-on vrêy paradis
Ses bwès tot åtou d’lèy sont lès plus bès,
Ses rus d’årdjint tot r’lûhant tournikèt,
Potchant d’pîre en pîre tot tchantant leûs rèspleûs.
Meyerbeer,li Pitch’rotte,l’Orléans,les Artisses
Hoûtez-lès don come il î sont ureûs.
Cès p’tits rus-là n’ont jamày dès tchants trisses.
Direût-on nin qu’à tot l’monde leû vwè dit:
« Spa nosse pitite vêye c’è-st-on vrêy paradis ».
Li grand Lîve d’Or qu’ponda Antwinne Fontaine
Riprésinte li passé,nosse glwére èt nosse fîrté.
Tos cès grands personèdjes,cès rwès,cès royènes
Ont marqué po todi li rinon d’nosse cité.
Portant t’as bin candjî … awè Spa t’as candjî.
Les grands sègneurs di dvins 1’timps t’ont rouvî.
Et si asteûr tu droûves tes brès à tot l’monde minme à pu p’tit
Spa mi p’tite vèye t’ès vrêmint on paradis.
Texte issu du livre « Bouket d’prétins » de Lucien Lamby (Cerke dès sizes walones Spa)