Voici un grand classique des récits de noël en wallon La bouquette emmacralée :

C’esteut l’ nute du Noyé, li mame féve des boûkètes, et tos les ptis efants, rassonlés dilé l’ feu rin k’ a houmer l’ odeur ki montéve del pêlète si sintît l’ êwe al boke et s’ raletchît les deuts.

Cwand on costé del påsse esteut djusse a l’ idéye, li mame prindéve li pêle, el hoyéve on ptit côp, et pwis, hop ! Li boûkète è l’ êr féve ene dimèye et dvins l’ mitan del pêle ritouméve cou-z å hôt.

Lèyîz-m’ on pô sayî, brèya li ptite Madjène, dji wadje del ritoûrner, d’ adreut do prumî côp. Vos alez vèyî, Mame. Et vola nosse glawene ki prind l’ pêle a deus mins, ki s’abaxhe on ptit côp…

Et rouf ! Di totes ses fwèces, elle evole li boûkète. Ele l’ èvola si bin k’ ele n’ a måy ritoumé. On cwèra tos costés, so l’ årmå, podrî l’ pwète, On n’ ritrova måy rin. Wice aveut-ele passé ?

Tolmonde si l’ dimandéve, et les cméres dè vinåve si racontît tot bas, al nute, åtoû do feû, ki c’ esteut sûr li diâle k’ esteut catchî dzo l’ tåve et ki l’ aveut magnî sins fé ni yene ni deus.

L’ iviér passa. L’ osté ramina les verdeurs et les fiesses di porotche ås djoyeus cråmignons. Tolmonde aveut dèdja roûvî ciste avinteure cwand li mére da Mådjène fa rblanki ses plafonds.

Vola don l’ bwègne Cola, blankiheu sins parey k’ arive avou ses breusses, ses håles et ses sèyês. I cminça dè bodjî les ptitès bardaxhrèyes k’ estît avå l’ manèdje; i westa les tåvlês ki pindît so les meurs; pwis, montant so s’ halète I dpinda l’ grand mureu ki hågnîve sol djîvå.

Et c’est podrî l’ mureu k’ on rtrova nosse boûkète, k’ esteut la dpôy sî meus, co pus deure k’ on vî clå , neure come on cou d’ tchapê, reude eco pé k’ ine beye , frèzéye come ine veye catche, et dzeur di tot çoula, tote coviète di strons d’ moxhe, et télmint tchamosséye k’ elle aveut des poyèdjes co pé k’ in agora.